၂၀၁၈ခုနှစ် မတ်လ ၂၉ရက်နေ့မှ စတင်ပြီး မြန်မာနိုင်ငံဆိုင်ရာ ဂျပန်သံအမတ်အနေနဲ့ တာဝန် ထမ်းဆောင်လျက်ရှိတဲ့ မာရုယာမဖြစ်ပါတယ်။ ကျွန်တော့်အနေနဲ့ ၁၉၇၈ခုနှစ်မှာ ဂျပန်နိုင်ငံခြားရေး ဝန်ကြီးဌာနကို စတင်တာဝန် ထမ်းဆောင်ခဲ့ပြီး ယခင်က ဗမာလို့ခေါ်ကြတဲ့ ယခုမြန်မာနိုင်ငံမှာ ဘာသာစကား လေ့လာမှုကို ပြုလုပ်ခဲ့ပြီးနောက် စတုတ္တအကြိမ်မြောက်အနေနဲ့ မြန်မာနိုင်ငံဆိုင်ရာ ဂျပန်သံရုံးမှာ တာဝန်ထမ်းဆောင်ခြင်း အပါအဝင် ဂျပန်မြန်မာနှစ်နိုင်ငံ ဆက်ဆံရေးအတွက် ကာလရှည်ကြာ မြှုပ်နှံထားခဲ့ပါတယ်။ လတ်တလောအနေနဲ့ ၂၀၁၁ခုနှစ်ကနေ လွန်ခဲ့တဲ့ ဖေဖော်ဝါရီလ လကုန်ပိုင်းအထိ သံမှူးကြီးအနေနဲ့ မြန်မာနိုင်ငံဆိုင်ရာဂျပန်သံရုံးမှာ ၆နှစ်တာ ကာလခန့်တာဝန်ထမ်းဆောင်ခဲ့ပြီး အဲဒီကာလအတွင်း မြန်မာနိုင်ငံဟာ ယခင် တာဝန်ထမ်းဆောင်ခဲ့တဲ့ ကာလများနဲ့ နှိုင်းယှဉ်ကြည့်ပါက များစွာ ပြောင်းလဲခဲ့တာကို တွေ့ရှိရပါတယ်။

၂၀၁၁ ခုနှစ် ဦးသိန်းစိန် အစိုးရ လက်ထက်နဲ့ ၂၀၁၅ခုနှစ် အထွေထွေ ရွေးကောက်ပွဲ ရလဒ်အရ သမိုင်းတွင်စေမယ့် NLD အစိုးရ အပြောင်းအလဲတွေကို ဖြတ်သန်းပြီးနောက် အရှိန်အဟုန်နဲ့ တိုးတက်လာတဲ့ ပြုပြင် ပြောင်းလဲရေးကြောင့် မြန်မာနိုင်ငံဟာ လက်ရှိမှာ ကမ္ဘာ့တစ်ဝန်းက အာရုံစိုက်နေကြတဲ့ နိုင်ငံတစ်နိုင်ငံဖြစ်လာပြီး ဂျပန်နှင့် မြန်မာနှစ်နိုင်ငံဟာ အလွန်တရာမှ ခိုင်မာတဲ့ ချစ်ကြည်ရင်းနှီးမှုတွေနဲ့ လေးနက်တဲ့ ဆက်ဆံရေး ကို တည်ဆောက်ခဲ့ပါတယ်။

မြန်မာနိုင်ငံသူ နိုင်ငံသား အများအပြားရဲ့ ထောက်ခံအားပေးမှုနဲ့ ပေါက်ဖွားလာတဲ့ ဒီအစိုးရအဖွဲ့အစည်းရဲ့ အောင်မြင်မှုကိုက စစ်မှန်သော ဒီမိုကရေစီ ဖွံ့ဖြိုးတိုးတက်ရေးမှာ အဓိကကျပြီး ကျွန်တော်တို့နိုင်ငံအနေနဲ့ အဲဒီအတွက်ကို အစိုးရရော ပုဂ္ဂလိကပါ ပါဝင်ပြီး တစ်ပေါင်းတစ်စည်းတည်း ဘက်ပေါင်းစုံမှ ကူညီထောက်ပံ့သွားမှာ ဖြစ်ပါတယ်။ မြန်မာနိုင်ငံရဲ့ စီးပွားရေးဖွံ့ဖြိုးတိုးတက်ရေး၊ လူ့စွမ်းအားအရင်းအမြစ် ပြုစုပြိုးထောင်ရေး၊ ဆင်းရဲမှုလျှော့ချရေး အစရှိတဲ့ ကဏ္ဍများမှာ ကူညီထောက်ပံ့ပြီး ပိုမို ဆောင်ရွက်သွားမယ်လို့ စဉ်းစားထားပါတယ်။

လွတ်လပ်ရေးရပြီးနောက် လက်နက်ကိုင်တိုင်းရင်းသား အဖွဲ့အစည်းများနဲ့ ငြိမ်းချမ်းရေး တည်ဆောက်ရေးအတွက် အကောင်အထည် ဖော်ရာမှာလည်း ဂျပန်နိုင်ငံဟာ မြန်မာနိုင်ငံ အမျိုးသား ပြန်လည်သင့်မြတ်ရေးဆိုင်ရာ ဂျပန်အစိုးရ၏ အထူးကိုယ်စားလှယ် မစ္စတာ ယိုဟဲအိ ဆာဆာကာဝါနဲ့အတူ ပူူးပေါင်းပြီး ဆက်လက်ဆောင်ရွက်သွားမှာ ဖြစ်ပါတယ်။

၂၀၁၃ခုနှစ်နဲ့ ၂၀၁၄ခုနှစ်မှာ ဂျပန်ဝန်ကြီးချုပ် အာဘေး မြန်မာနို်င်ငံသို့ ၂ကြိမ်တိုင်တိုင် လာရောက်လည်ပတ်ခဲ့ပြီး၊ ၂၀၁၆ခုနှစ်မှာ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်အနေနဲ့ ဂျပန်နိုင်ငံသို့ အလည်အပတ်ခရီးစဉ်၊ ယခင် သမ္မတကြီး ဦးထင်ကျော်၏ ၂၀၁ရခုနှစ်မှာ ဂျပန်နိုင်ငံသို့ အလည်အပတ်ခရီးစဉ် အစရှိတဲ့ နိုင်ငံခေါင်းဆောင်များရဲ့ ကူးလူးဆက်ဆံမှုများလည်း ရှိခဲ့ပါတယ်။ ယခုနှစ်ဦးပိုင်း ဇန်နဝါရီလမှာ ဂျပန်နိုင်ငံခြားရေးဝန်ကြီး မစ္စတာ ကိုနိုဟာ မြန်မာနိုင်ငံသို့ လာရောက်လည်ပတ်ပြီး ရန်ကုန်၊ နေပြည်တော် နဲ့ ရခိုင်ဒေသများသို့ သွားရောက်ခဲ့ပါတယ်။

မြန်မာနိုင်ငံမှာ လာရောက်နေထိုင်ကြတဲ့ ဂျပန်လူမျိုးများရဲ့ အရေအတွက်ဟာလည်း စာရင်းသွင်းထားတဲ့ အချက်အလက်များအရဆိုရရင် ခန့်မှန်းခြေ ၂၆ဝဝဦးခန့် ရှိနေပြီဖြစ်ပါတယ်။ ဒါ့အပြင် ၂၀၁၁ ခုနှစ်မှာ မြန်မာနိုင်ငံရှိ ဂျပန်ကုန်သည်ကြီးများအသင်းရဲ့ အသင်းဝင်လုပ်ငန်းပေါင်း ၅ဝခုရှိရာမှ ၃၇၀ အထိ တိုးလာခဲ့ပြီး ဂျပန်မြန်မာ နှစ်နိုင်ငံ အကြား စီးပွားရေးဆိုင်ရာ ပူးပေါင်းဆောင်ရွက်မှုရဲ့ ပြယုဂ်ဖြစ်တဲ့ သီလဝါ အထူးစီးပွားရေး စက်မှုဇုန်မှာလည်း ဂျပန် ကုမ္ပဏီ ၅ဝခန့်ဟာ ရှေ့ဆက် လုပ်ဆောင်သွားဖို့ ဆုံးဖြတ်ထားပြီးဖြစ်ပါတယ်။ မြန်မာနိုင်ငံမှာ စီးပွားရေး ဖွံ့ဖြိုးတိုးတက်ဖို့အတွက် အစိုးရရဲ့ အထောက်အပံ့သာမက ဂျပန် ပုဂ္ဂလိကလုပ်ငန်းများရဲ့ ရင်းနှီးမြှုပ်နှံမှု၊ စီးပွားရေးတို့သည် မရှိမဖြစ်လိုအပ်ပါတယ်။ နောက်ပိုင်းမှာလည်း မြန်မာနိုင်ငံဆိုင်ရာ ဂျပန်သံရုံးအနေနဲ့ မြန်မာစီးပွားရေးမှာ ဂျပန် ပုဂ္ဂလိကလုပ်ငန်းများရဲ့ ရင်းနှီးမြှုပ်နှံမှုကို အစွမ်းကုန် ကူညီသွားမှာဖြစ်ပါတယ်။

ကျွန်တော့် အနေနဲ့ အခုလို တာဝန်ထမ်းဆောင်စဉ် ကာလအတွင်းမှာ နှစ်နိုင်ငံ ချစ်ကြည်ရင်းနှီးမှုကို ပိုပြီးခိုင်မာလာအောင် အင်တိုက်အားတိုက် ဆောင်ရွက်သွားမယ်လို့ စဉ်းစားထားပါတယ်။

မြန်မာနိုင်ငံမှာ နေထိုင်လျက်ရှိကြတဲ့ ဂျပန်လူမျိုးများနဲ့ အလည်အပတ် ဒါမှမဟုတ် စီးပွားရေးကိစ္စများနဲ့ ကာလတိုနေထိုင်နေကြတဲ့ ဂျပန်လူမျိုးများအားလုံး လုံခြုံစိတ်ချစွာ နေထိုင်နိုင်ကြဖို့အတွက်လည်း ဘေးကင်းလုံခြုံရေးဆိုင်ရာ သတင်းအချက်အလက်များ ထုတ်ပြန်မှုအပါအဝင် စီမံခန့်ခွဲမှုဆိုင်ရာ ဝန်ဆောင်မှုများကိုလည်း ကြိုးစားဆောင်ရွက်သွားမှာ ဖြစ်ပါတယ်။

မြန်မာနိုင်ငံမှာ နေထိုင်နေကြတဲ့ ဂျပန်လူမျိုးများအပါအဝင် မြန်မာနိုင်ငံနဲ့ သက်ဆိုင်တဲ့ ကိစ္စရပ်များကို ဆောင်ရွက်နေကြတဲ့ ဂျပန်လူမျိုးများ၊ ဂျပန်ကုမ္ပဏီများ၊ အဖွဲ့အစည်း များမှ ပုဂ္ဂိုလ်များအနေနဲ့ ကူညီထောက်ပံ့မှုများ၊ ပူးပေါင်းမှုများကို ဆက်လက် ပြုလုပ်ပေးကြပါရန် မေတ္တာရပ်ခံ ပန်ကြားအပ်ပါတယ် ခင်ဗျာ။