၁။ ဂျပန်အစိုးရသည် နိုင်ငံတကာအသိုက်အဝန်းက အဖန်တလဲလဲ တိုက်တွန်းပြောဆိုနေကြသည့်တိုင်အောင် အရပ်သားပြည်သူများအပေါ် မြန်မာတပ်မတော်နှင့် ရဲတပ်ဖွဲ့၏ အင်အားသုံး အကြမ်းဖက်မှုများကြောင့် မတ်လ ၂၇ရက်နေ့တွင် တစ်နေ့တည်းသေဆုံးသူအရေအတွက် ယခုအချိန်အထိ အများဆုံးအဖြစ် ရောက်ရှိသွားရပြီး မြန်မာနိုင်ငံတွင် သေဆုံး၊ ဒဏ်ရာရသူ အများအပြား ဆက်လက်ထွက်ပေါ်နေသည့် အခြေအနေအ‌ပေါ် ပြင်းပြင်းထန်ထန် ကန့်ကွက်ရှုတ်ချပါသည်။ ထို့ပြင် သေဆုံးခဲ့သူများ၏ ကျန်ရစ်သူမိသားစုများနှင့် ထပ်တူဝမ်းနည်းကြေကွဲရပါကြောင်း ပြောကြားလိုပြီး ဒဏ်ရာရရှိခဲ့သူများအားလုံး အမြန်ဆုံးသက်သာ ပျောက်ကင်းပါစေကြောင်း လှိုက်လှိုက်လှဲလှဲ ဆုတောင်းမေတ္တာာ ပို့သအပ်ပါသည်။

၂။ မြန်မာတပ်မတော်နှင့် ရဲတပ်ဖွဲ့များက အရပ်သားပြည်သူများအား သေနတ်ဖြင့်ပစ်ခတ်ခြင်းနှင့် ဖမ်းဆီး ထိန်းသိမ်းခံရသူများအပေါ် လူသားချင်းစာနာထောက်ထားမှုမရှိစွာ ပြုမူဆက်ဆံခြင်း၊ မီဒီယာလှုပ်ရှားမှုများအ‌ပေါ် တင်းကျပ်စွာ ကိုင်တွယ် နှိမ်နင်းနေခြင်းများသည် ဒီမိုကရေစီစနစ်ကို အလေးထားကြောင်း ပြောဆိုနေသည့် မြန်မာ့တပ်မတော်၏ တရားဝင်ထုတ်ပြန်ကြေညာချက်များနှင့် ဆန့်ကျင်နေသော လုပ်ရပ်များဖြစ်သည်။ နိုင်ငံ့တပ်မတော်သည် နိုင်ငံသူ နိုင်ငံသားများ၏ အသက်ဘေးကို ပြည်ပခြိမ်းခြောက်မှုအန္တရာယ်များမှ ကာကွယ်စောင့်ရှောက်ပေးရန်အတွက် ဖွဲ့စည်းထားသော အဖွဲ့အစည်းဖြစ်ကြောင်းကို မြန်မာ့တပ်မတော်ဦးဆောင်သူများက သတိပြုသင့်ပါသည်။

၃။ ငြိမ်းချမ်းစွာ ဆန္ဒဖော်ထုတ်လှုပ်ရှားမှုများအပေါ် ကျည်အစစ်များ အသုံးပြုဖြိုခွင်းနေခြင်းကို မည်သို့မျှ ခွင့်လွှတ်နိုင်စရာမရှိပါ။ မြန်မာ့တပ်မတော်က အရပ်သားပြည်သူများအပေါ် အကြမ်းဖက် နှိမ်နင်းမှုများ ချက်ချင်းရပ်တန့်ရန်၊ နိုင်ငံတော်၏အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်အပါအဝင် ဖမ်းဆီး ထိန်းသိမ်းခံထားရသော ပုဂ္ဂိုလ်များကို အမြန်ဆုံးပြန်လွှတ်ပေးရန်နှင့် ဒီမိုကရေစီနည်းလမ်းကျသော နိုင်ငံရေးစနစ် အမြန်ဆုံးပြန်လည်ဖော်ဆောင်ရေးအတွက် မြန်မာ့တပ်မတော်အား ဂျပန်အစိုးရက ထပ်မံ၍ အလေးအနက်ထား တိုက်တွန်းလိုက်ပါသည်။